【都話唔好再錫錫咯！！】
長文！慎入！不過唔好睇完呆咗！
好多人都問我點解繼武漢之後，意大利就好似成為武漢2.0咁？
我唔係威威醫生、顯赫講者，不過幾星期以來日夜芒住意大利當地新聞，隔日又同奶奶姑拉請安了解意大利當地實況，不如等我好簡短解答一吓大家嘅十萬個為什麼：
🙋🏻♀點解意大利傳染率咁快？
🧐的確，意大利首當其衝喺二月初已有中國旅遊人士確診個案。但緊記，全歐洲都未經歷過03年沙士之痛，佢哋仍然唔了解肉眼看不見嘅病毒，不知不覺間，每人每日以2.5個人嘅傳播率蔓延。加上意大利嘅文化習俗，人哋見面禮錫一邊臉，意大利人太熱情，嫌一邊唔夠要錫夠兩邊，依家連距離都要保持一米，要意大利人一改la dolce vita (甜蜜的生活)的習慣，實在非常困難。
🙋🏻♀點解意大利喺眾多有感染個案最多？
🧐喺全歐美，意大利仍然係目前做得最多武肺測試嘅國家，至今差不多達10萬個測試。咁係咪代表其他國家其實感染數字都咁高？不測不報，冇人答到🤷🏻♀
🙋🏻♀點解意大利嘅死亡率咁高？
🥺連香港都不斷傳來新聞話由於意大利醫療系統已崩潰，嚴重床位不足導致多人失救......‘it's sad but true’...全意大利分咗20個區，Lombardy倫巴第區首先淪陷，至今錄得近一萬宗確診。醫生被迫對確診者做出困難的抉擇：根據患者嘅1)年齡，2)生命跡象去決定搶救與否，而喺一個人口老化問題咁嚴重嘅意大利，年過80嘅大有人在，這令齋係Lombardy區嘅死亡率達9%。全國至今1266人因#武漢肺炎 死亡，當中7成有890人都屬Lombardy區內。
🙋🏻♀點解意大利已封國，感染數字仍把把聲咁升？
😔好遺憾，只能講一句「針唔吉到肉唔知痛」，意大利喺一星期前宣布封鎖北部14個省。如同武漢嘅逃離潮爆發，超過25000人逃離北部到意大利嘅中南部。諷刺嘅係，部分逃離嘅意大利人覺得難得一家大細都唔洗返工返學，就一於搞返個合家滑雪團！一大班人衝往意大利各滑雪勝地玩個痛快！昨日種咩因，今日得咩果；由於一般潛伏期為5-7日，所以衛生局預料未來幾日有額外4-5000宗新確診個案。
🙋🏻♀咁點解意大利人唔戴口罩？
😥另一個遺憾係，全歐美甚至非洲國家，都認為戴口罩的先係病人。甚至啲意大利男人話，喺塊面度戴口罩同女人著T-back冇分別🙄，都係乜都遮唔到。意大利政府由首兩完確診個案到前日都宣布冇病徵唔需要戴口罩！琴日終於改口風嘞，話若有必要同人有緊密接觸，距離一米範圍內，就建議最好戴口罩。有心唔怕遲，不過都真係好遲囉！等到就嚟2萬宗先嚟宣布，有冇慢啲啊？
🙋🏻♀咁點解意大利政府唔管嚴啲？
😏嚴咗㗎嘞！嗱，自封國後，總理孔特宣布，凡任何人冇實據要離開自己個社區，一經發現會罰款206歐元至監禁三個月不等。🤦🏿♀🤦🏿♀🤦🏿♀
🤷🏻♀依家仲有咩舖頭開門？
😐仍開門做生意的有超級市場啦，藥房啦，仲有tabaccaio(即係專賣煙仔嘅店舖)，政府認為呢三類舖頭都提供市民必須品喎。煙仔都係必須品？🤷🏻♀
🤷🏻♀咁意佬屋企人點算？
😌感恩奶奶仲好有中氣，孫女唔洗返學日日陪住婆婆。姑拉呢就改為隔日返工，每次出門都要填寫一份自我申報表，說明點解出街，點解要跨區。例如姑拉要返工，就寫埋公司名咁。意佬姐夫幫手買餸，每個社區所有超市門口都會棟一個警察叔叔喺度，分流放市民入去買餸，一個出就一個入。
唔知以上資料解唔解答到大家嘅疑問，如果有咩想知，可以再問我🙂。
Photo credit to : 《嫁到3》
#嫁到意大利
#但仲喺埃及
#武漢肺炎實錄
#十萬個為什麼
#希望答到大家
#不過我仲未答到自己去定留😔
#埃及呢幾日氣場好差
Search